Муус устар 26 күнүгэр Дьокуускай куоракка Үүнэр көлүөнэ Государственнай театрыгар биһиги нэһилиэккэ олорон, үлэлээн, нэһилиэк сайдыытыгар кырата суох кылааттарын киллэрбит РСФСР үөрэҕириитин туйгуна, учууталлар учууталлара бэлиэлээх Томская Люция Георгиевна уонна РСФСР тыатын хаһаайыстыбатын үтүөлээх үлэһитэ, Норуоттар Доҕордоһуулара орден кавалера, Степан Аржаков аатынан совхозка экономиһынан, директорынан үлэлээбит Иванов Георгий Андреевич дьиэ кэргэттэригэр аналлаах кинигэ билиһиннэриитэ буолла. Кинигэни “С благодарностью к моим родителям” диэн ааттаан кинилэр кыыстара Николаева Алина Георгиевна нууччалыы-сахалыы тылынан, 73 экземплярынан “Дани-Алмас” ХЭТ типографиятыгар бэчээттэтэн таһаарда. Кинигэҕэ Сивцевтар, Томскайдар, Ивановтар, Николаевтар төрүччүлэригэр сыһыаннаах архыып матырыйааллара, чугас аймахтарын, бииргэ үлэлээбит коллегаларын, доҕотторун ахтыылара киирбиттэр. Бу дьоро киэһэни Бүлүүтээҕи библиотека үлэһитэ Луиза Яковлевна Кононова иилээн-саҕалаан ыытта, кинигэни Чернышевскайдааҕы библиотека кылаабынай библиотекара Любовь Прокопьевна Корякина билиһиннэрдэ. Кинигэ Россияҕа учуутал уонна уһуйааччы, Саха сиригэр Үлэ сылларыгар тахсыбыта ордук кэрэхсэбиллээх. Бу киэһэҕэ биһиги нэһилиэктэн кыттыыны ыллылар “Чернышевскай нэһилиэгэ” МТ баһылыга А.С.Амбросьев, “Кыталык” НАДь директора Николаева Н.В., специалистара Егорова В.А., Протопопов Н.Н.
