Тохсунньу 27 күнүгэр Чернышевскай нэһилиэгэр Сылы арыйар тэрээһин П.П. Николаев аат. «Кыталык» НАДь буолла. Быйылгы сыл Чернышевскай нэһилиэгэр ТҮМСҮҮ уонна СОМОҔОЛОҺУУ сылыгар ананна. Тэрээһин 4 блокка арахсан буолла.
1 блок. В.В.Путин Арассыыйаҕа ПЕДАГОГ уонна НАСТАВНИК сылынан биллэрбитэ. С.М.Васильев аат. Чернышевскай орто оскуолатыгар үлэлии сылдьар учуутал дьиэ кэргэттэри сценаҕа ыҥырдылар. Александр Алексеевич, Евдокия Петровна Васильевтар, Дьулустан Федорович, Надежда Дмитриевна Семеновтар күндү ыалдьыт буоллулар. Учуутал дьиэ кэргэттэри оскуола коллективын аатыттан М.П.Николаева эҕэрдэлээтэ.
Үөрэппит учууталларыгар, Н.Г.Чернышевскай аат. ВППК студентката Айталина Корякина э5эрдэ ырыа бэлэхтээтэ.
2 блок. Саха сиригэр Үлэ сылынан биллэриллибитэ. Чинэкэ икки Социалистическай Үлэ Геройдарынан киэн туттар. Өр сыл эдэр эрдэҕиттэн үрүҥ илгэни үрүлүппүт, чулуу үлэһит , үлэ ветерана нэһилиэкпит убаастанар Далбар Хотуна Розалия Филипповна Гаврильева сыанаҕа таҕыста.
Розалия Филипповна бииргэ үлэлээбит дьүөгэлэрэ Саргылана Сухарева, Елена Михайлова, Ирина Корякина истиҥ иһирэх тылларын анаатылар, сибэкки дьөрбөтүн туттардылар.
Евгений Корякин «Ферма кыргыттара» диэн ырыаны анаата.
3 блок. Бүлүү улууһугар бу сыл Доруобуйа сылынан биллэриллибитэ. Биһиги нэһилиэккэ өр кэмҥэ үлэлээбит маҥан халааттаах аанньалларбыт ааттара ааттанна, билиҥҥи уустук кэмҥэ нэһилиэк туһугар кыһаллан үлэлиир, 40 ча сыл балыһаҕа үлэлээбит Антонина Васильевна Николаеваны дохсун ытыс доҕуһуоллаах сценаҕа ыҥырдылар. Ыал истиҥ иһирэх ийэлэрэ, эрчимнээх аныгылыы үҥкүүнэн эҕэрдэлээн, дьону — сэргэни чөл олоххо ыҥырдылар. Бүлүү улууһун доруобуйа харыстабылын эҕэрдэ суруга туттарылынна.
4 блок. Нэһилиэккэ Түмсүү уонна Сомоҕолоһуу сыла арыллыбытыгар ананна. Баһылык Антон Сергеевич Амбросьев: «2023 сыл үүннэ. Россияҕа бу сыл Педагог уонна наставничество сылынан биллэрилиннэ. Саха сиригэр Үлэ сылынан. Булуу улууһугар Доруобуйа сыла. Быйылгы сыл Чернышевскай нэһилиэгэр ТҮМСҮҮ уонна СОМОҔОЛОҺУУ сылынан биллэрилиннэ. Нэһилиэкпит сайдарын туһугар үлэни өрө туппут дьоммут такайыыларынан, үөрэтиилэринэн, бары түмсэммит үлэни өрө тутуоҕуҥ, нэһилиэк дьоно-сэргэтэ сомоҕолоһон күүспүтүн холбоон сайдыаҕыҥ»- диэн туран быйылгы сылбытын арыйабыт» — диэтин кытта, нэһилиэк депутаттара, түөлбэ салайааччылара, тэрилтэ салайааччылара сценаҕа таҕыстылар, дьоҥҥо- сэргэҕэ өрө көтөҕүүлээх тыллары эттилэр. Түмүккэ «Доҕордоһуу ырыата» доргуччу ылланна.
«Сомоҕолоһон- биир ситим буолуоҕуҥ» — диэн тыллар доргуччу этилиннилэр.
