Балаҕан ыйын 18 күнүгэр, күнүс 2 ч. нэһилиэк олохтоохторо самаан сайын кэнниттэн, сайыны быһа үлэлээбит, буспут-хаппыт көлөһүммүт түмүгүн көрдөрөөрү-атастаһаары, атыылаары “Кыталык” н.а. дьиэтин тэлгэһэтигэр “Көмүс күһүн бэлэхтэрэ” диэн ааттаах тэрээһиҥҥэ муһуннулар.
Тэрээһини олохтоох дьаһалта баһылыгын солбуйааччыта А.А.Николаева үөрүүлээхтик арыйда. Нэһилиэккэ 6 түөлбэ баарыттан Севернай, Октябрьскай, Сарыал, Кэскил түөлбэлэр, тэрээһиҥҥэ күүскэ бэлэмнэнэн кэлэн кытыннылар.
🔴Түөлбэлэр көмүс күһүҥҥэ аналлаах фотозона оҥордулар,
🔴60-тан үөһэ саастаах кэрэ аҥардар “Көмүс күһүн” авангард муода көрдөрдүлэр.
🔴Оҕолор күһүн туһунан хоһоон аахтылар.
Күһүн ас арааһа амтаннааҕа дэлэй буолан оҕуруот аһыттан, бэйэ оҥоһуутуттан быыстапка-дьаарбаҥка тэриллэн, дьон сүргэтэ көтөҕүллүннэ, наадалаах-туһалаах битэмииннэринэн кыһыҥҥы хаһаастарыгар эбинэн үөрдүлэр- көттүлэр.
🔴Нэһилиэк тэрилтэлэрэ тэрээһиҥҥэ кыттыһан кэлбит ыалдьыттары бэрт араас начинкалаах минньигэс бөрүөктэринэн күндүлээтилэр.
🔴Күлүмүрдэс күһүнүнэн эдэр ырыаһыт, күтүөппүт Петр Николаев бэрт сэргэх ырыатынан кэлбит дьону эҕэрдэлээтэ.
Төһө да тыаллаах, эмиэ да хаардаах-ардахтаах күһүҥҥү күн буоллар нэһилиэк олохтоохторо, оҕолоро үөрэн-көтөн, астынан, дуоһуйа сынньанан, сылаас үтүө санаалаах тарҕастылар.
Бу аата күһүнүм бардаҕа
Ыллыкпын көмүскэ кистээтэ,
Арай мин хааллаҕым сайыһа
Эһиилги күһүнү кэтэһэ…
