“Долун” үҥкүү коллектива төрөппүттэр өйөбүллэринэн (салайааччы СР культуратын үтүөлээх үлэһитэ Люция Афанасьевна Прокопьева) 4 улахан күрэххэ кыттардыы сыал-сорук туруоран сааскы каникулга Дьокуускай куорат диэки айаҥҥа турунна.
Бастакы күрэхпит Хатаска «Праздник Терпсихоры” үҥкүү коллективтарыгар Аан дойдутааҕы фестиваль буолла. Манна 146 заявка киирэн уопсайа 1500 кыттааччылаах улахан күрэх ааста. Биһиги уолаттарбыт күүстээх коллективтар быыстарыгар киирэн дипломант буолан ситиһии бастакы үөрүүтүн биллилэр.
Ол күн Хатастан бу оҕолор Намҥа ыстаннардылар. Манна махтаныа этибит биһиги нэһилиэк биир бастыҥ суоппарыгар Крылов Геннадий Александровичка. «Күн мичээрэ» XIII Республиканскай үҥкүү күрэҕэр 1 степеннээх Лауреат үрдүк аатыгар тиксэн оҕолор олуһун диэн үөрдүлэр.
Дьэ салгыы Дьокуускай куоракка «Кындыкан – душа Севера” улахан Аан дойдутааҕы фестивальга 1 степеннээх Дипломант буоллулар. Маннык улахан күрэххэ оҕолор бастакытын сүрэхтэннилэр.
Салгыы «Танцует детство» республиканскай үҥкүү күрэҕэр кыттан 1 степеннээх Лауреат үрдүк аатын ыллылар.
Бу сырыыларын истэн Люция Афанасьевна урукку иитиллээччилэрэ оҕолорго харчынан спонсордааннар сынньалаҥнарын тэрийдилэр.
Бу курдук оҕолорбут туһалаахтык каникулларын атааран, ситиһии кынаттанан, сири-дойдуну көрөн, оҕолордуун билсэн кэллилэр. Махтаныа этибит бастатан туран төрөппүттэргэ, спонсордарга уонна оҕолору салайан, көрөн-истэн, бүөбэйдээн илдьэ сылдьыбыт салайааччыларыгар Люция Афанасьевнаҕа. Өссө да саҥа ситиһиилэр “Долун” коллективыгар сиэттиһэн кэлэ турдуннар.
