Бу күрэххэ кыттыбыт Ийэлэрбит олохторун ыйааҕынан, дьылҕаларын түөрэҕинэн төрөөбүт түөлбэлэригэр, үөскээбит алаһаларыгар, сорохторо кийиит кыыс сиэринэн дьиэ-уот тэринэн, бур-бур буруо таһааран, оҕо-уруу тэнитэн ыал буолан Чинэкэ нэһилиэгэр олороллор.
Дьүүллүүр Сүбэ — түөлбэлэрбит эр дьоно олорон сыаналаатылар.
Кыргыттар хара платье кэтэн, симэхэ кэрэтин иилинэн уустарын-удьуордарын, эҕэрдэ тылларын тиэртилэр.
Эдэркээн Ийэлэрбит дьиэҕэ-уокка таҥна-сапта, тутта-хапта сылдьалларын, аныгы дьиэ хаьаайката хайдах буоларын көрдөрдүлэр.
Тарбаҕар талааннаах Ийэлэрбит дьиэлэригэр араас материаллартан букет арааһын оҥорон аҕалан көрдөрдүлэр, кэпсээтилэр.
Салгыы түһүмэххэ деловой Ийэ обраһын көрдөрдүлэр.
кыталык кыыллыы дугунан, куба курдук күөгэлдьиспит, сахалыы сайаҕас санаалаах, сибэкки кэриэтэ көрүөхтээх кэрэ бэйэлээх ийэлэрбит бу түһүмэххэ — таҥас маанытын кэтэн кэрэмэн көстүүлэрин көрдөрдүлэр.
Күрэх түмүгүнэн:
«КҮН ИЙЭ» күрэх кыайыылааҕынан буолла Кэскил түөлбэттэн Айна Семенова.
«Көрөөччү биһирэбилэ» анал аат Октябрьскай түөлбэттэн Айыына Семенова
«Сандаара» анал аат Сарыал түөлбэттэн Василиса Ксенофонтова
«Намыына» анал аат Заречнай түөлбэттэн Саргылана Алексеева
«Мичээрэ» анал аат Солнечнай түөлбэттэн Александра Корякина
«Күндүүнэ» анал аат Заречнай түөлбэттэн Мария Филиппова
Күндү эдэркээн ийэлэр!
Түбүктээх күҥҥүт түмүктээх буоллун,
сыралаах сырыыгыт сыаналаах буоллун,
туппуккутуттан туһа таҕыстын,
уурбуккутуттан уон оччо эбилиннин,
Таарыйбыккытын Таҥара тыыннаатын,
Айбыккытын Айыы тойон алҕаатын!