Чэбдик салгыннаах сааскы күммүт күндээрбитинэн, ыраас хаар үллүктээх кырыа кыһын кыйдаммытынан, көхтөөх көрөөччүлэрдээх, кыраһыабай кыттааччылардаах дьоро киэһэ үүммүтүнэн бука барыгытыгар ис сүрэхтэн эҕэрдэбин тиэрдэбин!
Күммүт чаҕылыччы тыган, уһаан, оҕо –аймах саҥата чугдааран, таһырдьа үлэ-хамнас элбээн сэргэхсийии уксээтэ. Бу маннык кэрэ кэмҥэ бастыҥтан бастыҥ, күүстээхтэн күүстээх бүтүн аан дойдутааҕы, россиятааҕы уонна республиканскай күрэхтэр кыайыылаахтара, нэһилиэкпит талааннаах оҕолоро, улэһиттэрэ дьоро киэһэни бэлэх ууннулар.
Быйылгы сылбыт тэрээһиннэрэ нэһилиэкпитигэр Улуу Кыайыы 80 уонна Чернышевскай нэһилиэгэ төрүттэммитэ130 сыллаах үбүлүөйдэригэр ананар.
Үүммүт күммүт үчүгэйиттэн
Үгүөрүтүк уллэһиннин
Кэлбит күн кэрэтиттэн
Кэмчилээбэккэ бэристин!
Сааскы күн күлүмэ
Сүрэҕи үөртүн,
Сибиэһэй салгына
Туругу тупсардын.
Иллээх олох
Иилии куустун
Алаһа дьиэбит
Алгыһынан туоллун
Барыта үтүө буоллун!-
диэн нэһилиэкпит талааннаах ыччатыгар махтанабыт, өссө да ситиһиилэри баҕарабыт!
